Ngā Tikanga Aromatawai mō ngā Aromatawai ā-roto

Ko tā ēnei Tikanga he tuku kupu aratohu mō te aromatawai i ngā Paerewa Paetae ā-roto. Ka tukuna he kupu aratohu mō: 

• ngā herenga whāiti mō ngā aromatawai katoa o tēnei Paerewa
• ngā ara e tika ana, me ngā āhuatanga, o te whakaemi taunakitanga  
• te mātua whai kia motuhēhē ngā taunakitanga.

Me taunga ngā kaiaromatawai ki ngā aratohu mō ngā tikanga aromatawai i ngā whare ako, tae noa atu ki te whakaū i ngā angawā me ngā aukatinga. Kei te pae tukutuku a NZQA ētahi rauemi ka whai hua pea kia pānuitia tahitia ai me ēnei Tikanga Aromatawai. 

Me ōrite ngā Kaupapa Here Aromatawai me ngā Tikanga Aromatawai a ngā whare ako ki ā NZQA Ture Aromatawai mō ngā Kura kua Whakaaetia kia Whakahaere Aromatawai. Kei tēnei hononga ngā kupu aratohu mō te whakahaere i ngā mahi mātairua ā-roto me te whakaemi taunakitanga. 

Te Whakaemi Taunakitanga 

E pīngore ana ngā aromatawai ā-roto mō te wāhi ki te whakaemi taunakitanga. He nui ngā ara e taea ana te whakaemi taunakitanga kia hāngai ai ki ngā taera whakaako me te ako, me te whānuitanga o ngā horopaki whakaako me te ako. Me āta whakaaro te ara e āhei ai ngā ākonga ki te whakaatu i ā rātou taunakitanga pai katoa, i runga i te/ngā Paerewa, ā, kia kaua hoki ērā e whai herenga kiko kore. 

E tūtohua ana kia hāngai, kia whakaū hoki te hoahoa o te aromatawai i te āhua e ako ai ngā ākonga. Ka whai wāhi atu pea ki ngā whakaeminga taunakitanga mō ngā aromatawai ā-roto tētahi ngohe tōroa, tētahi tūhuratanga, ngā taunakitanga ā-matihiko (pēnei i ngā hopukanga uiui, i ngā hauhiko, i ngā whakaahua, i ngā kiriata rānei), tētahi huinga taunakitanga rānei, engari kia kaua hoki e herea ki ērā. 

Ko ngā aromatawai whai hui, me hāngai ki te āhua o ngā akoranga e aromatawaitia ana, me whakatakoto hoki i ngā ara wātea mō ngā hiahia kanorau o ngā ākonga katoa, ā, me tika, me tōkeke hoki.

Te Whakaū i te Motuhēhēnga o ngā Taunakitanga

Me mātua whakaū te motuhēhēnga o ngā taunakitanga a ngā ākonga, ahakoa te ara e whakaemihia ai ngā raraunga. Me ōrite tēnei ki ngā kaupapa here a te whare ako me ā NZQA Ture Aromatawai mō ngā Kura kua Whakaaetia kia Whakahaere Aromatawai.

Me taea ngā taunakitanga a ia ākonga te tautohu, me whakaata hoki ngā mahi tonu a te ākonga. Me tika te whakaatu o ngā taunakitanga i ngā mōhiotanga motuhake me ngā mahi ka taea e te ākonga, i runga i te Paerewa e aromatawaitia ana. Ka whai wāhi atu ki tēnei ko ngā taunakitanga ka tāpaea hei wāhanga ki tētahi aromatawai ā-rōpū, ko ngā taunakitanga ka whakaputaina i waho o ngā akomanga, ko ērā kāore rānei i mātakitakihia e te kaiaromatawai, me ngā taunakitanga i whakaputaina i runga i te whakamahia o te atamai waihanga aunoa (Gen AI). Me āta whakaaro te whakamahia o te GenAI i te horopaki o te Parewa e aromatawaitia ana me ōna Tikanga Aromatawai, me matapaki hoki me ngā ākonga i mua i te aromatawai, ka mutu, me kōrero ki te whakamahia. Hei tauira, ka whai wāhi atu pea ki tētahi tūhuratanga i karawhiua i ngā nohoanga maha, ēnei e whai nei:   

• ngā aratohu kaiako e pā ana ki te āhua me te whānui o ngā whakamahinga GenAI e whakaetia ana, mēnā e pērā ana
• ngā mātakitakinga me ngā kōrero a te kaiaromatawai
• te hui ki ngā ākonga i ngā wā i whakaritea, i ngā kaupeka matawai rānei
• ngā mauhanga mō ngā kokenga a te ākonga, pēnei i ngā whakaurunga whakaahua, i ngā kupu āki GenAI rānei i whakamahia.