He aha te ariā o Pāngarau

Ko te Pāngarau te āheinga o ngā tāngata ki te whai, ki te whakamahi, ki te whakamārama, ki te whakawhitiwhiti kōrero, whakawhitiwhiti whakaaro mō ngā pārongo me whakaaro pāngarau, tauanga, hei kawe, hei whakahaere i ngā wero pāngarau me ngā wero tauanga o ngā pūāhua huhua o te ako, o ngā kawenga o ia rā, o ngā kawenga a te kirirarau pai, o ngā tini horopaki ahurea-pāpori, o te mahi anō hoki.

E tūhono ana te Toi Tātai ki ngā ritenga pāpori o tētahi ahurea, o tētahi horopaki. Whakaritea ai ngā whakatau toi tātai i runga anō i ngā paearu pāpori, ā, ka maha hoki ngā wā me whakamārama, me parahau hoki te taunga.

Ka pai anō te toi tātai hei torotoro i ngā take o te tuakiri ahurea. Māna hoki e tautoko te whakaaro arohaehae, me te arotakenga o ngā pāpāho, ngā tirohanga pāpori me ngā āhuatanga nui kua pā i roto i ngā tau.

Tuitui ai ngā tāngata toi tātai i ngā tukanga pāngarau me ngā tukanga tauanga ki ngā kaupapa, ā, hei reira whakawhitiwhiti kōrero ai, ā-pāngarau nei. Mā te tūhonohono tahi i ngā tukanga, ngā kaupapa, te whakawhitiwhiti kōrero me te whakahāngai (ki ngā āhuatanga ahurea-pāpori) ka tautokona ngā tāngata toi tātaitai kia kite i ngā tikanga whakaotioti me ngā putanga.

Hoahoa 1 E whakaatu ana te hoahoa nei i te raranga tahi o ngā aho reo Matatini o te pāngarau, ngā aho tukanga, ngā aho whakaaro pāngarau me ngā aho ahurea-pāpori.

Ngā Whakaaro Whānui: Te Reo Matatini o te Pāngarau

  • Te whakaaro whaitake me te whakawhitiwhiti kōrero, ā-pāngarau nei, ki te reo Māori.

Ngā Whakaaro Whānui: Ngā Horopaki Ahurea-Pāpori

  • Te tautohu me te whakamāori i ngā hanga ahurea-pāpori i ngā pūāhua/horopaki pāngarau, tae atu ki te tūhonohono i te pāngarau, te ahurea, me te hapori.

Ngā Whakaaro Whānui: Ngā Tukanga

  • Te whakakaupapa i ngā pūāhua ki ngā tikanga pāngarau
  • Te whakamahi i ngā tikanga pāngarau ki ngā tini pūāhua whaitake
  • Te whakamāori me te arotake i te whaitake o ngā pūāhua

Ngā Whakaaro Whānui: Pāngarau

  • Ngā Paheko Tau
  • Te Ine me te Āhuahanga
  • Ngā Tauira me ngā Pānga
  • Te Tauanga me te Tūponotanga