Ka mau i tēnei Ngohe Aromatawai ētahi o ngā whakaakoranga me ngā akoranga ka noho hei tūāpapa mō te aromatawai. Kāore koe e aromatawaihia mō ngā mahi whakariterite, mō te rangahau, mō ngā whakaharatau hoki i mua i te aromatawai motuhenga. Ko tō whakaaturanga anake hei taunakitanga mō tēnei Paerewa Paetae.

Wāhanga 1

I a koe e matapaki ana ki tō kaiako, ka whiriwhiri koe i:

• tētahi pūrākau hei kōrero māu
• ngā wāhanga e toru i tētahi pekanga o Te Ao Haka hei whakamahinga māu ki te whakatakoto i tētahi pūrākau i tētahi whakaaturanga.

I a koe e whiriwhiri ana i ō wāhanga, whakaarohia ērā mā reira e eke ai te kōrerotanga o tō pūrākau ki te taumata teitei katoa.

Me whakaaro hoki e koe te āhua e pai ai tō:

• whakaatu i ngā āhuatanga tāpua me ngā huānga o te pekanga kua kōwhiria mā te whakamahi i ngā nekehanga kua āta whakaritea, i ngā koringa hoki e tika ana
• whakaatu i ngā pūrākau, i ngā kōrero rānei me te toi ā-kaupapa whāiti e hāngai ana ki te kāhua o ia wāhanga, i te āhua hoki i whai tikanga ai ngā wāhanga me ngā pekanga mā ngā whakapuakanga e tika ana
• āta whakaatu i ngā momo kāhua i waenga i ngā wāhanga mā te hāngai rawa atu o te whakatinanatanga
• whakaatu i te āhua o tā ngā momo waehanga pā ki te whakaaturanga (te kupu, te mita, te rangi, te kākahu, te kaihaka, te poi, te rākau, te nekehanga)
• whakaatu i te pekanga i runga i te kaha o te ngoi, i runga hoki i te ihi, i te wehi, me te wana
• eke ki te taumata teitei katoa ka taea i tō whakaatu i ō pūkenga mā tō whakaaturanga.

Ka āhei tō mahi takitahi, tō mahi takirōpū rānei ki te auaha i tō whakaaturanga. Ka āhei tō whakamahi i ngā huānga, pēnei i te whakaariari me ngā kākahu hei āwhina i te kōrerotanga o tō pūrākau. Hei tauira, mehemea e rere ana tō whakaaturanga i taua wā tonu, ka pai pea tō waihanga i tētahi pae whakaari, i tētahi papamuri rānei e tū ai koe ki mua ki te mahi i tō whakaaturanga. Mehemea kei te whakaahua koe i tō whakaaturanga, ka pai pea tō whakaatu i tēnā, i tēnā o ngā wāhanga ki tōna anō wāhi e kawe ana i tētahi kōrero e pā ana ki tō pūrākau

Ahakoa te takitahi rānei, te takirōpū rānei o te whakaaturanga, māu tonu tōu ake tohungatanga e whakaatu.

Wāhanga 2

Whakapakarihia, whakapaingia ake hoki tō whakaaturanga mā te rangahau kua oti i a koe i Wāhanga 1. Tirohia ngā ara e paruhi ai tō whakaaturanga. Me hopu, me mātiro rānei ō whakawai e whai whakahokinga kōrero ai koe mō te huarahi e pai tonu ake ai koe.

Me whakaharatau mō te hemo tonu atu!

Whakaarohia tō minenga, ā, auahatia he wā i tō whakaaturanga e whai hononga ai rātou, e urupare ai hoki rātou ki te pūrākau e kōrero nā koe. Āta whakatauria te āhua e whakaatu ai koe i te ārahitanga i a koe e whakarite ana i tō mahi whakaaturanga.

 E whakaaturia ana rānei i tō whakaaturanga tō:

• māramatanga ki te pekanga me ngā wāhanga kua kōwhiria?
• whai whakaaro ki ngā waehanga me mātua whai wāhi ki tō whakaaturanga?
• kaha ki te whakaatu i ngā wāhanga i runga i te ihi, i te wehi, me te wana?

Ngohe Aromatawai - Whakaaturanga

Whakaaturia tō pūrākau. Ka āhei te whakaaturanga inamata, te whakaaturanga rānei kua hopungia.