I tēnei ngohe, ka kōwhiri koe i tētahi tūmomo mai i tētahi o ngā pekanga o Te Ao Haka, ka whakaaturia ai i tōna tīmatanga ki tōna mutunga. Ka tū tō whakaaturanga ki roto i te akomanga.

Ka mau i tēnei Ngohe Aromatawai ētahi o ngā whakaakoranga me ngā akoranga ka noho hei tūāpapa mō te aromatawai. Kāore koe e aromatawaihia mō ngā mahi whakariterite, mō te rangahau, mō ngā whakaharatau hoki i mua i te aromatawai motuhenga. Ko tō whakaaturanga anake hei taunakitanga mō tēnei Paerewa Paetae.

Wāhanga 1

Ka kōwhiri koe i te pekanga hei whakaatu māu, ka kōwhiri hoki koe i te tūmomo whāiti mai i taua pekanga. Ka kōwhiria i roto i te akomanga, ā, ka āhei tō mahi ā-rōpū.

Pūrongotia tāu e mōhio nā mō:

• ngā āhuatanga tāpua o tō pekanga, tae atu ki ngā rerenga kētanga ā-iwi, ā-hapū, ā-rohe rānei o ēnei āhuatanga tāpua
• te orokohanganga me ngā horopaki o taua pekanga
• ngā kōrero ka hāngai ki te tūmomo ka whakaaturia e koe

Rapuhia ngā tauira o ngā whakaaturanga ka hāngai ki ia pekanga hei mātakitaki māu. Tērā pea he pāhotanga inamata, he hōtaka pouaka whakaata, he whakaaturanga ā-ipurangi rānei.

Wāhanga 2

Me whakaharatau mō te hemo tonu atu!

Whakaharatautia tō whakaaturanga. Ka whai māramatanga koe i ō rangahau o mua mō ngā pekanga; i tōna tikanga, mā reira e āwhina tō whakaaturanga.

Whakaharatautia te mau roa o te ngao, o tō ū, o te tika hoki i te roanga ake o te tūmomo. Me mārama hoki tō tuku i ō kōrero.

Me whakaahua ō whakaharatau ki te ataata, tono atu rānei ki tētahi tangata e whakapono nā koe, pēnei i tō kaiako, i tētahi hoa, i tō whānau, i tētahi kaiārahi, i tētahi kaumātua rānei kia mātakitaki i a koe ka whakahoki kōrero ai hei āwhina i a koe kia warea ai tō minenga ki te āhua o tō whakaaturanga.

Ngohe Aromatawai –  Te Whakaaturanga

Whakaaturia te katoa o tō tūmomo, mai i te tīmatanga ki tōna mutunga, i mua i tō kaiako.