Te wāhanga 1

Kōwhiria tētahi wehenga nō tētahi tūmomo o Te Ao Haka hei waihanga nekehanga hou māu. Whakawhānuitia ō mōhiotanga ki te kaupapa o te tūmomo i kōwhiria ai e koe mā te rangahau, mā te matapaki rānei i te kaupapa ki tētahi, pēnei i te kaiako, i tētahi nō tō whānau e whakapono nei koe, i tētahi kaumātua, i tētahi hoa rānei.  

Ka hiahia pea koe ki te mātakitaki i ētahi ataata o ō tino tūmomo nō Te Ao Haka, inarā, i ngā mea e aro ana ki ngā nekehanga. Ka mātaki ana koe, whakamātauhia te tautohua, te whakaahuatia, me te whakamahia o ngā huānga. Whakaarohia te whakapuakitia o te kaupapa mā roto mai i ngā nekehanga.  

Te wāhanga 2

Kua kōwhiria e koe tō tūmomo, kua taunga hoki koe ki te kaupapa, nō reira, whakaarohia:

• ngā mea e hiahia nei koe kia mārama, kia rangona hoki e tō minenga ka kite ana rātou i ō nekehanga
• tō whakawhiti i ērā āhuatanga me ērā mōhiotanga mā te whakamahi i ngā huānga o Te Ao Haka.

Whakaritea tētahi nekehanga hukihuki e āta whakaata ana i te kaupapa mā te whakatōpū i whānuitanga o ngā huānga e toru, e toru hemihemi rānei. Me haere ngātahi ēnei huānga hei whakapakari, hei tautoko hoki i te pūtake whānui o ō nekehanga. Kia mutu tō nekehanga hukihuki, tuhia he kupu tīpoka e whakaahua ana i ngā huānga kua whakamahia e koe, te take i whakamahia ai, me te āhua o te rere ngātahi. Whakamāramahia te take e puta ai tētahi hua whāiti ki tō nekehanga i tēnei whakatōpūtanga, me te whakaaweawe pea o tērā i ngā urupare a te minenga.  

Te wāhanga 3

Ka pātai pea koe ki tētahi tangata e whakapono nei koe, pēnei i te kaiako, i tētahi nō tō whānau, i te kaumātua, i tētahi hoa rānei, hei titiro ki tō nekehanga hukihuki. Ka kōrero pea rātou i ngā mea e tāpua ana ki a rātou, ki ētahi atu āhuatanga rānei hei whakaaro māu. Whakamahia ā rātou whakahokinga kōrero mō ngā panonitanga whakamutunga o ō nekehanga.  

Me whakatau koe mēnā rānei ka hiahia koe māu anō e whakaatu ō nekehanga, ka whakaakona rānei e koe ki ētahi atu. Mēnā ko koe tonu ka whakaatu i ō nekehanga, me whakaharatau i mua o tētahi ataata, o tētahi kāmera rānei, i mua rānei i tētahi e whakapono nei koe.  

Mēnā e whakaako ana koe i ō nekehanga ki ētahi atu, whakaaturia ngā nekehanga, ka whakamārama ai i te āhua e hiahia nei koe kia whakaaturia ai ngā huānga i kōwhiria ai e koe i te whakaaturanga.  

I a koe e pērā ana, me huritao ngā āhuatanga e pai ana, me ngā mea hei whakapakari. E āta kitea ana rānei te kaupapa i ngā huānga i kōwhiria ai e koe i te nekehanga? Panonihia ngā āhuatanga whakamutunga i tō nekehanga.  

Me āpiti ki tō tāpaenga whakamutunga o tō nekehanga hou tētahi whakamārama ā-tuhi. I tēnei tāpaetanga, whakaahuatia te whānuitanga o ngā huānga kua whakamahia, te wāhi ki tēnā me tēnā, me te mahi ngātahi o ērā hei whakaata i te kaupapa, e puta mai ai hoki tētahi hua ataata pakari. Whakamāramatia te take i kōwhiria ai e koe aua huānga tonu rā. Parahautia ō kōwhiringa i runga i ngā whakaaro me ngā kare ā-roto e hiahia nei koe kia puta i te minenga ka kitea ana ō mahi.  

Ki te kōwhiri koe kia whakaaturia tō nekehanga i te akomanga, me whakaaro te whakaritea o ētahi kupu tīpoka hei āwhina i tō whakaaturanga. Ka āwhina ēnei kupu tīpoka i tō kōrero e pā ana ki ngā huānga kua whakamahia e koe, me tana tautoko i tō kaupapa me ngā hua e hiahiatia ana i tō mahi.