Ka mau i tēnei Ngohe Aromatawai ētahi o ngā whakaakoranga me ngā akoranga ka noho hei tūāpapa mō te aromatawai. Kāore koe e aromatawaihia mō ngā mahi whakariterite, mō te rangahau, mō ngā whakaharatau hoki i mua i te aromatawai motuhenga. Ko tō whakaaturanga anake hei taunakitanga mō tēnei Paerewa Paetae.

Wāhanga 1

Ka whakatau koe i te horopaki mō tō whakaaturanga. Tērā pea, ko te taiopenga mō Matariki rānei tēnā, ko te Wiki Hākinakina rānei tēnā, ko te Koroneihana rānei tēnā, ko Ngā Manu Kōrero rānei tēnā, ko ngā Pakanga ā-Pā rānei tēnā, ko tētahi rānei o ngā hui e hia nei o te marae tēnā.

Ka āhei hoki tō mahi whakaaturanga ki tētahi taiopenga ā-kura, ā-hapori rānei.

Mā kōrua ko tō kaiako e matapaki tētahi hui, tētahi taiopenga rānei e tika ana mō tō whakaaturanga, me te whakaaro ki te tāpuatanga me te kaupapa o taua taiopenga, ki te āhua ā-tirohanga, ā-ngākau hoki o te whakaaturanga i tōna whānuitanga.

I a koe e matapaki ana ki tō kaiako, ka kōwhiri koe i tētahi pekanga o Te Ao Haka. I taua pekanga kua kōwhiria e koe, ka kōwhiri koe i ngā wāhanga e toru hei whakaaturanga. Ahakoa te takitahi rānei, te takirōpū rānei o te whakaaturanga, māu tonu tōu ake tohungatanga e whakaatu.

Mā koutou ko tō rōpū e whakatau te pekanga me ngā wāhanga e pīrangi nei kia noho hei wāhanga e aromatawaihia ai koutou, me te mahara anō ki te hāngai o ēnei ki te hui, ki te taiopenga rānei kua kōwhiria e koutou. Whakaarohia hoki te pekanga, ngā wāhanga hoki mā reira e kaha ai koe ki te:

• whakaatu i ngā āhuatanga tāpua me ngā huānga o te pekanga kua kōwhiria mā te whakamahi i ngā nekehanga kua āta whakaritea, i ngā koringa hoki e tika ana
• whakaatu i ngā pūrākau, i ngā kōrero rānei me te toi ā-kaupapa whāiti e hāngai ana ki te kāhua o ia wāhanga, i te āhua hoki i whai tikanga ai ngā wāhanga me ngā pekanga mā ngā whakapuakanga e tika ana
• āta whakaatu i ngā momo kāhua i waenga i ngā wāhanga mā te hāngai rawa atu o te whakatinanatanga
• whakaatu i te āhua o tā ngā momo waehanga pā ki te whakaaturanga (te kupu, te mita, te rangi, te kākahu, te kaihaka, te poi, te rākau, te nekehanga)
• whakaatu i te tūmomo i runga i te kaha o te ngoi, i runga hoki i te ihi, i te wehi, me te wana
• eke ki te taumata teitei katoa ka taea i tō whakaatu i ō pūkenga mā tō whakaaturanga.

Wāhanga 2

Whakapakarihia, whakapaingia ake hoki tō whakaaturanga mā te rangahau kua oti i a koe i Wāhanga 1. Tirohia ngā ara e paruhi ai tō whakaaturanga. Me hopu, me mātiro rānei ō whakawai e whai whakahokinga kōrero ai koe mō te huarahi e pai tonu ake ai koe.

Me whakaharatau mō te hemo tonu atu!

Whakaarohia tō minenga. Ka pēhea tō rātou mōhio ki Te Ao Haka? He aha ngā hua ka puta ki tō whakaaturanga mehemea e mārō ana te hononga o tō minenga ki Te Ao Haka, tēnā, i te minenga kātahi anō ka whai wheako ki tēnei kaupapa?

Me whakarite wā i tō whakaaturanga e whai hononga ai, e urupare ai tō minenga ki te kōrero, ki te karere rānei e kawea ana e koutou. Āta whakatauria te āhua e whakaatu ai koe i te ārahitanga i a koe e whakarite ana i tō mahi whakaaturanga.

E whakaaturia ana rānei i tō whakaaturanga tō:

• māramatanga ki te pekanga me ngā wāhanga kua kōwhiria?
• whai whakaaro ki ngā waehanga me mātua whai wāhi ki tō whakaaturanga?
• kaha ki te whakaatu i ngā wāhanga i runga i te ihi, i te wehi, me te wana?

Ngohe Aromatawai - Whakaaturanga

Me mahi whakaaturanga ki te hui, ki te taiopenga rānei kua kōwhiria. Kāore te whakaaturanga e herea ki te wā.

E āhei ana te noho o ō wāhanga e toru i tētahi pekanga hei wāhanga mō tētahi whakaaturanga nui ake, engari, ka aromatawaihia anake te whakaaturanga o ngā wāhanga e toru.

Mā kōrua ko tō kaiako e whakarite te āhua e taea ai tō mahi te aromatawai. Mēnā kāore ia e wātea ki te tae atu ki te whakaaturanga, me whakarite koe kia hopungia, e mākahia ai e ia.