I ahu mai tēnei paerewa paetae i The New Zealand Curriculum (NZC), Te Pou Taki Kōrero, Te Tāhuhu o te Mātauranga, 2007, ā, ka hāngai ki ngā whāinga o ngā Whakaaro Whānui i te Taumata 8 o te Tukutuku Ako o Te Ao Haka ki ngā Taumata 6, 7, 8. 

Ka whai wāhi ki te whakaatu māramatanga ki tētahi tūranga tāpua i roto i Te Ao Haka:

• te whakaahua i tētahi tūranga e whai koha ana ki tētahi whakaaturanga i Te Ao Haka;
• te matapaki i tōna āheinga, i te āhua hoki o te hāngai o ngā herenga o te tūranga ki ngā pūkenga ka mau i te wā o te rangahau i Te Ao Haka.

Ka whai wāhi ki te arotake i tētahi tūranga tāpua i roto i Te Ao Haka:

• te mātai i ngā wā whakahirahira ka rangona i te whakaritenga me te whakatutukihanga o ngā mahi o te tūranga;
• te tūhura i ngā ara e pāngia ai pea te whakaaturanga e te whai hua o te whakatutuki i te tūranga, e te korenga rānei o te whakatutukihanga i whai hua.

Ka whai wāhi ki te tātari i tētahi tūranga tāpua i roto i Te Ao Haka:

• te mātai i te tūranga i te horopaki whānui ake o Te Ao Haka, tae atu ki te matapaki i ana tikanga.

Ko tētahi tūranga tāpua, ko te tūranga e tino kitea ai, e tino rangona ai hoki rānei te rerekētanga i te korenga o te kaihāpai i taua tūranga i reira.

Me kōwhiri te ākonga i tētahi o ēnei tūranga tāpua e whai ake nei:

• te tū hei kaitātaki wahine, hei kaitātaki tāne rānei
• te whakaatu i tētahi hīanga, i tētahi waiata takirua rānei
• te ārahi i ētahi atu ākonga
• te whakatangi i tētahi taonga puoro hei kīnaki i te whakaaturanga
• te tū hei kaitā moko i te kapa
• te tiaki kākahu
• te waihanga taonga (pēnei i te poi) mō te whakaaturanga.

E kōrero ana ngā wā whakahirahira mō ngā wā o te tukanga hei whakarite, hei whakatutuki hoki i te tūranga me āta mahi e puta ai te hua e whāia ana.

Ko ētahi wā whakahirahira:

• i mua i te tūranga: ko te eke a te tangata i ngā taumata e tika ai te tohua ōna ki te tūranga
• i te wā o te tūranga: ko te whakaharatau, ko te whakawai rānei
• i te wā o te tūranga: ko te kake i tētahi taupā, i tētahi hapa rānei
• i te wā o te tūranga: ko te whakarite kia angitu
• i te wā o te whakaaturanga: ko te whai kia eke rā anō, kia tutuki te tūranga.