He whakapuakanga mātauranga Māori a Te Ao Haka i whakaaweawetia ai e ngā pūnaha mātauranga a te iwi, a te hapū, a te rohe whāiti hoki. Ka pōhiritia ngā ākonga e tēnei Paerewa Paetae ki te whai wāhi atu ki ngā wāhanga kei roto i tētahi pekanga o Te Ao Haka i kōwhiria ai. Kāore ēnei wāhanga e matapōkere ana, engari, ka whakaatu kē i ngā momo motuhaketanga, i ngā tūmomo rānei, e kawe nei i ngā tikanga ahurea me ngā pūtake.  

I tēnei Paerewa Paetae, ka tūhura ngā ākonga i ngā wāhanga kei tētahi pekanga kotahi o Te Ao Haka i kōwhiria ai, e whakaata nei i ngā kāhua, i ngā tikanga, me ngā pūtake ahurea e motuhake ana. Mā te huritao arohaehae me te whakamāori ahurea, ka whai whakaaro te ākonga ki te ara e kawea ai te tikanga, ki te whakaahuatia o te whakapuakanga e te horopaki, me te pānga o ia wāhanga ki a rātou anō.  

Ka tautoko tēnei Paerewa Paetae i te mātau ahurea, ka whakaū hoki i te uara o ngā tirohanga Māori, mā te akiaki kia kauanuanu tā te tangata whai wāhi atu ki ngā hanga me ngā mātauranga kei roto i Te Ao Haka.   

Te whāinga o te Paerewa Paetae

Ko te pūtake o tēnei Paerewa Paetae, ko te whakaatu a te ākonga i ō rātou mōhiotanga ki ngā wāhanga e whakaaweawe nei i tētahi pekanga o roto i Te Ao Haka i kōwhiria ai. Ka tautohu, ka whakaahua hoki ngā ākonga i tētahi kōwhiringa o ēnei wāhanga, ka whakaatu ai i te kawe o tēnā, o tēnā i ōna anō tikanga (ngā tikanga ahurea e tika ana, ngā uarā, ngā kawa), i tōna kaupapa, me ngā whāinga whakapuakanga, e whakaaweawetia nei e ngā pūnaha mātauranga a te iwi me te hapū. Ka whakaaturia te āhua e whakapuakina ai ēnei wāhanga i te whakaaturanga, me te ara e whakaatatia ai te hanga me te pūtake o Te Ao Haka.  

He whakapapa tō tēnā, tō tēnā wāhanga, i waihangatia ai mā roto i ngā pūnaha mātauranga a te iwi me te hapū, ā, he mea whakaaweawe e te horopaki me te whāinga. Mā te mōhio ki tērā whakapapa e āwhinatia ai tā te ākonga kite, ehara noa iho Te Ao Haka i tētahi kohinga titonga, engari, he whakaataranga kē o ngā mātauranga Māori me ngā kōrero tuku iho kei roto i a ia. Ka tūhura ngā ākonga i ngā rerekētanga o ngā wāhanga puta noa i ngā rohe, me te whakaaweawe a te horopaki - pēnei i te pōwhiri, i te poroporoaki, i te tangihanga, i te kaupapa whakanui rānei — i te kōwhiringa me te whakaaturia o ia wāhanga.  

Ka whakawātea tērā i te ara e whakaaro arohaehae ai ngā ākonga ki ngā pānga i waenganui i ngā wāhanga, ki ngā ōritenga me ngā rerekētanga, me te whakamahi i ngā taunakitanga hei tautoko i ō rātou mōhiotanga. Ahakoa e aro ana te aromatawai ki ētahi kōwhiringa wāhanga, e akiakitia ana te tūhuratanga whānui i ngā mahi ako, e tautokona ai tā te ākonga whakamaioha atu ki te hōhonutanga me te kanorautanga o Te Ao Haka.  

Te whakatau tika

Ka tautohu, ka whakaahua hoki ngā ākonga i ngā wāhanga e rua, e rua hemihemi rānei, i tētahi pekanga kotahi o Te Ao Haka, e whakaatu ana i ngā motuhaketanga o ia wāhanga. Ka tautokona ā rātou whakaahuatanga ki ngā tauira e hāngai pū ana ki ia wāhanga, e whakaaturia ai te taunga ki ōna āhuatanga tautuhi.  

I ngā taumata teitei ake o te paetae, me whakamārama ngā ākonga i te pūtake me te horopaki o ia wāhanga, e whakaaturia ai te mōhiotanga ki te take ka pērā te whakaaturia i ētahi horopaki, pēnei i te pōwhiri, i te poroporoaki, i te tangihanga, i te kaupapa whakanui rānei. Ka tātaria te pānga i waenganui i ngā wāhanga, ka matapakina ngā ōritenga me ngā rerekētanga, ka whakamahia hoki ā rātou tauira hei taunaki i ēnei whakatairitenga. Mā reira e hōhonu ake ai te whakaatatia o te māramatanga ki te whakaaweawehia o ia wāhanga e ngā tikanga, e te kaupapa, me te mātauranga Māori.  

Ka tautokona ngā whakataunga i tēnei taumata ki ngā taunakitanga o te whakaaro arohaehae, o te mōhiotanga ahurea, me te mōhio ki te whakamāori i te tikanga i Te Ao Haka. Ko ngā whakataunga tika kei runga i te pai o tā te ākonga tūhonohono i ōna mōhiotanga ki te whāinga o te Paerewa, me te āta whakawhiti kōrero e pā ana ki ērā mōhiotanga i ngā ara whakaahua, tātaringa hoki.  

I tēnei aromatawai, me rite tonu te kōrerohia o ngā wāhanga e rua i kōwhiria ai, puta noa. 

Te whakaemi taunakitanga

Tirohia ngā Whakamārama Aromatawai ā-Waho mō te roanga ake o ngā kōrero.  

Ngā horopaki e taea ana

Ko ngā ākonga ka whai wāhi ki tēnei Paerewa Paetae ka aro ki ngā wāhanga whānui i tētahi pekanga kotahi o Te Ao Haka, me te tūhura i te whakaaweawetia o ērā e ngā pūnaha mātauranga a te iwi, a te hapū, a te rohe whāiti hoki.  

Me hāngai ngā horopaki o tēnei Paerewa ki ngā wheako me ngā takenga ahurea o ngā ākonga. Ka whai wāhi atu pēa ki ēnei, ko:

• ngā whakaaturanga taketake a te iwi o te rohe, a te hapū rānei  
• ngā haka, ngā wāiata, ngā tikanga poi a te kura, a te whānau rānei
• ngā pūranga o ngā tūmomo, ngā tūmomo o nāianei rānei, o tētahi pekanga kua kōwhiria (hei tauira, te mōteatea, te waiata ā-ringa, te haka, te poi)  
• ngā tūhuratanga ā-kaupapa pēnei i ngā tūmomo ā-tikanga, ngā titonga mautohe, ngā tūmomo whakaaturanga whakanui rānei.

E akiakitia ana kia whānui te kuhuna atu o ngā wāhanga ka karawhiua ana te hōtaka ako e hōhonu ake ai te mōhiotanga o ngā ākonga. Heoi, i tēnei Paerewa Paetae, ko te kupu wāhanga, ko ngā mea e rua i te pekanga kotahi. Ahakoa e pai ana kia nui ake ngā mea ka tūhuraina e ngā ākonga, ko ngā wāhanga anake i kōwhiria ai ka aromatawaitia.