Te wāhanga 1

Me matapaki te rōpū i ngā tūmomo o tō whakaaturanga haka ka whakaaturia e koutou ki te whakataetae. Kōwhiria te tūmomo o Te Ao Haka e tino whai tikanga ana ki a koe, e whakatakoto hoki ana i te ara e taea ai e koe te whakaatu ō mōhiotanga ki tētahi kaupapa ā-rohe mā te whakaaturanga.  

Kōwhiria kia rua, kia neke atu rānei, ngā āhuatanga tāpua o Te Ao Haka e āwhina ana i tō whakawhiti i ngā korero me te whakapuaki i te kaupapa o te tūmomo i kōwhiria ai e koe. Ka mahi ngātahi koutou ko tō rōpū, engari ka aromatawaitia motuhaketia te whai wāhi me te whakaaturanga a tēnā, a tēnā.  

I ō whakaritenga, ka whakaaro pea koe:

• ki ngā āhuatanga tāpua o Te Ao Haka ka whakamahia e koe i tō whakaaturanga, ā, ka pēhea tā tērā whakaata i ngā rerekētanga ā-hapū, ā-iwi, ā-rohe rānei
• ki te tūmomo o Te Ao Haka e pai katoa ana te kitea o ō pūkenga whakaaturanga
• ki ngā wāhanga hirahira katoa o te paki, ā, he aha ngā āhuatanga e hiahia nei koe kia mārama ai te minenga e pā ana ki te kaupapa i kōwhiria ai e koe
• ka pēhea tō whakawhiti i ngā kōrero, tō whakapuaki hoki i aua wāhanga i tō whakaaturanga o tō tūmomo e kitea ai te hononga me te whakatinanatanga o te kaupapa
• ki te mātaki i ngā ataata o ētahi atu whakaaturanga o Te Ao Haka hei mātakitaki i tā ngā kaihaka whakamahi i ngā āhuatanga tāpua hei kawe i ā rātou kōrero — tirohia ngā tūkawe e pakari ake ai pea tāu ake whakaaturanga.  

Te wāhanga 2  

Me mātua:

• rite tonu tō whakaharatau i tō whakaaturanga hei tautoko i tō māramatanga, i tō māia hoki, i a koe e karawhiu ana i tō whakaaturanga
• tūhura ngā ara e āwhinatia ai e ngā āhuatanga tāpua i kōwhiria ai e koe tō kawe me te whakawhiti i tō kōrero paki, i tō paki whaiaro rānei
• whakaaro ki te whai wāhi o tēnā, o tēnā āhuatanga tāpua ki te whakapuakitanga o tō kaupapa, me te whakaata o tō whakaaturanga i ngā rerekētanga ā-hapū, ā-iwi, ā-rohe rānei
• whakapai ake tō whakaaturanga mā ngā whakaharatau — me aro ki te whakapakari i te karawhiua o ia āhuatanga tāpua e āta whakatinanahia ai e tō whakaaturanga te kaupapa, e whakanuia ai hoki ngā hononga ā-hapū, ā-iwi, ā-rohe rānei ki tō kōrero paki.

Hopukina ō whakaharatau, pōhiritia rānei tētahi e whakapono nei koe (tō kaiako, tētahi hoa, tētahi nō tō whānau, tētahi kaiwhakaruruhau, tētahi kaumātua rānei) hei mātakitaki me te whakahoki kōrero hei whakapai ake, hei whakapakari hoki i tō whakaaturanga.  

Uia ēnei pātai ki a koe anō:

• E whai hua ana rānei taku whakamahi i ngā āhuatanga tāpua o Te Ao Haka ki te kawe i taku kaupapa?
• E āta kitea ana te māramatanga ki taku kaupapa, me tōna horopaki ā-rohe, i taku whakaaturanga?
• Kua kōtuia atu, kua karawhiua hoki e au ngā āhuatanga tāpua o Te Ao Haka, me te kōtui atu i ngā rerekētanga ā-hapū, ā-iwi, ā-rohe rānei hei whakarākei i te kōrero paki?  
• E whakatinana ana rānei, e whakapuaki ana rānei taku whakaaturanga i te kaupapa e kitea ai e te minenga te hononga?  

Te wāhanga 3

Ko te rā whakataetae! Kua oti katoa ngā mahi whakariterite, kua eke ki te wā e karawhiua ai tō whakaaturanga. I tōna tikanga kua oti kē ēnei te ata whakariterite hei tautoko i tō angitutanga:  

• I mua i te whakaaturanga, me whakamōhio tō kauako ki te kaupapa i kōwhiria ai e koe, me te tūmomo kua kōwhiria e koe kia aromatawaitia.
• Kua rite katoa ō kākahu, ō kahu ōrite rānei, ngā whakakai, me ētahi atu taputapu (h.t. he pari, he piupiu, he poi, he rākau).
• Kua whakarite he whakaaturanga whakangungu i mua i te eke ki te atamira me tētahi ngohe whakarite i te korokoro e māia ake ai, e nui ake ai hoki tō aro ki tō tū.
• Kua whakaritea e tō kaiako, e tētahi rānei o tō whānau e whakapono nei koe, i te hopukina o tētahi tūmomo o tō whakaaturanga o Te Ao Haka.