Rauemi:

Pakitau - Te tātai i te tere toharite
Pakitau - Te Wā
Pakitau - Te Tawhiti Āwhata

Kupu Marau:

ataata - video
āwhata - scale
huri - convert
manomita i te haora - kilometres per second
mita i te hēkona - metres per second
ōwehenga - ratio
pāpātanga - rate (km/h), (m/h), (m/s)
tātai - calculate
tawhiti - distance
tere - speed
tere toharite - average speed
tukanga - process
waeine - unit of measurement
whakapūioio - to extend, consolidate

Ngā Tohutohu: 

1. Whakaatuhia te ataata ki ngā mokopuna, ā, wānangahia ngā ture mō te tawhiti, te tere, me te wā.
2. Ka waihanga rātou i tētahi kāri rautaki e whakarāpopoto ana i te tukanga tātai i te tawhiti, te tere, me te wā, ki ā rātou ake kupu. Me māmā, me poto ngā tohutohu kia taea ai e tētahi atu te whai.
3. Whakaatuhia ngā ataata e whai ake nei kia mōhio ngā mokopuna me pēhea te tātai i te tere toharite, te wā, te whakamahi āwhata kia ine i te tawhiti anō hoki.
4. Hoatu ngā pakitau e hāngai ana ki ia ataata hei whakapūioio i ngā akoranga nō ngā ataata.

• Hei whakamutu, ka waihanga rātou i tētahi kāri rautaki mō ia ataata e whakarāpopoto ana i te tukanga tātai ki ā rātou ake kupu. Me māmā, me poto ngā tohutohu kia taea ai e tētahi atu te whai.

Kupu Marau:

aroā - comprehend
whakatau tata - estimate
tere toharite - average speed
wā toharite - average time

Kupu Here:

Mahere Tawhio Kūkara - Google Earth tour
utauta ā-hiko - digital tools

Rauemi:

Mahere Rangahau
Hei Tauira: Mahere Rangahau

E mōhiotia whānuitia ana a Kupe i ngā moutere o Te Moananui-a-Kiwa. He maha ngā kōrero mōna me āna haerenga ki runga i te moana, ā, ka whakatau ko Kupe te kaiurungi tuatahi i tae atu ki Aotearoa. He mana nui tō Kupe nā runga i ōna kāwai whakapapa, ōna pūkenga me āna wheako whakatere moana.

Huri noa i ngā motu o Aotearoa, he maha ngā kōrero mō ngā hekenga whakapapa o Kupe tae atu ki a tātou te Māori. Nō ngā tau e 200 neke atu i muri mai i te hōpara haere a Kupe, te hekenga mai o ngā waka o ō tātou tūpuna ki Aotearoa.

Hei Tūāpapa:

• Me whai wā ngā mokopuna ki te rangahau i ngā kōrero tuku iho mō ō rātou ake waka.
• Me aro hoki ngā mokopuna ki te kimi kōrero tuku iho i ēnei momo puna mātauranga ki raro nei, i mua i te aro ki ngā paetukutuku:
  • mōteatea
  • tauparapara
  • uiui kaumātua
  • pukapuka
  • whakapapa
  • toi Māori

Whakamahia te Mahere Rangahau hei awhina i ngā mokopuna ki te kohi i ngā kōrero kia hāngai pū ki te mahi a te kaiurungi me te hekenga mai o tōna waka ki Aotearoa. Mā te whakakī i te mahere rangahau, ka rite ngā mokopuna mō ngā ngohe e whai ake nei. Ko te aronga ko te akiaki i ngā mokopuna ki te aroā i ngā kōrero tuku iho kua kohia ki te mahere rangahau, hei taunaki i ngā mahi ine.

Ngā Tohutohu:

Ka waihanga ngā mokopuna i tētahi Mahere Tawhio Kūkara e whakatau tata ana i te ara whakatere o tō rātou waka ki Aotearoa. Ka whakamahi i tā rātou mahere rangahau hei arataki i tēnei mahi. Hei āwhina i ngā mokopuna, māu e whakarite i tētahi tauira Mahere Tawhio Kūkara e whakaatu ana i ngā āhuatanga me ngā utauta ā-hiko o te paetukutuku - Google Earth.

Anei ngā āhuatanga me uru atu, me whakaatu rānei i roto i te Mahere Tawhio Kūkara:

• te wāhi i wehe tuatahi ai te waka (Hawaiki)
• ngā taunga waka ki ngā moutere o Te Moananui-a-Kiwa
• ngā taunga waka ki Aotearoa
• te taunga whakamutunga o te waka ki Aotearoa
• te ara o te waka mai i Hawaiki ki Aotearoa.

Ka whakamahi i ngā utauta ā-hiko ki te ine i te tawhititanga o te terenga o te waka mai i Hawaiki ki Aotearoa.

• Me whai whakaaro ki ngā ūtanga ki moutere kē, pēnā i a Tākitimu i ū ai ki Rarotonga.
• Me whai whakaaro hoki ki ngā wāhi i ū ai te waka ki roto o Aotearoa.

Hei mahi whakamutunga, me tātai te tere toharite, te wā toharite rānei o te waka mai i Hawaiki ki Aotearoa, mā te whakamahi i te tawhititanga kua inea ki te Mahere Tawhio Kūkara.

Rauemi:

Pikitia Whakaahua - Ngā Tōpana o Tawhirimātea

Kupu Marau:

ahunga - direction
matapae - predict
paetukutuku - website
pikitia whakaahua - poster
pere - arrow/s
puhautanga - buoyancy
tautuhi(nga) - define, definition
tō ā-papa - gravity
tōpana - force
whakahohoro(tia) - acceleration
waku - friction

Ngā Tohutohu:

• Whakarōpūhia ngā mokopuna ki ngā rōpū e whā.
• Hoatu te pikitia whakaahua - Ngā Tōpana o Tāwhirimātea ki ia rōpū.
• Ka rima meneti te roa ki te matapae i ngā tōpana e whakaaweawe ana i te waka hourua. Ka tuhia ngā tōpana ki ngā wāhi o te pikitia whakaahua.
• Wānangahia ō rātou whakaaro, ā, tuhia ki te papamā.
• Ka tohua e ngā rōpū nō ēhea atua ngā tōpana e whakaaweawe ana i te waka hourua.
• Wānangahia ō rātou whakaaro, ā, tuhia ki te papamā.
• Ka tāngia he pere hei whakaatu i te ahunga o ngā tōpana e whakaaweawe ana i te waka hourua.
• Wānangahia ō rātou whakaaro, ā, tuhia ki te papamā.
• Tukuna tētahi tōpana ki ia rōpū, ā, mā rātou e kimi tautuhinga mō tāua tōpana. He rauemi pai te paetukutuku o Paekupu. Kātahi, ka tū te rōpū ki mua i te akomanga ki  te whakamārama i taua tōpana mā te kupu me te ā-ringa. 
• Mō ngā rōpū e mātakitaki ana me kapo ngā whakamārama ki o rātou ake pikitia whakaahua.                 

Hei Whakapūioio:

Tohua ngā rōpū ki te hanga whakaari poto e whakaatu ana i:

• ngā tōpana e whā, e whakaaweawe ana i tētahi waka hourua
• te ahunga o ngā tōpana e whakaaweawe ana i te waka hourua
  • ngā atua e tuku ana i aua tōpana.

Rauemi:

Kāri Poihau Tākirirangi

Kupu Marau:

matapaki - discuss
raraunga - data
raraunga houanga - time-series data
taurangi - variable/s
taurangi rāwekeweke - independent variable 
taurangi whakatina - controlled variable
taurangi whakamauru - dependent variable 
tōpana - force/s
tūhuratanga tauanga - statistical investigation
tukanga - process
whakamātau - experiment
whakapātaritari - to challenge, provoke
whitianga - diameter

He whakamātau whai āwhina tēnei e whai māramatanga ai ngā mokopuna ki ngā āhua o ētahi o ngā tōpana kua ākona ki te ngohe tuatoru. Whakaritea tō akomanga me ngā taputapu kia pai ai ngā mahi a ngā mokopuna. Hoatu ngā Kāri Poihau Tākirirangi ki ia rōpū, ā, ko tāu mahi he ārahi i a rātou ki te whai i ngā tikanga e hāngai ana ki te tūhuratanga tauanga e whai wāhi mai ana te raraunga houanga:

• Te Whakapae: Ka whakatakotoria he pātai hei tūhura
• Te Tukanga: Ka whakamaheretia te tūhuratanga
• Te Kohi Raraunga: Ka kohia he raraunga e hāngai ana ki te pātai
• Te Otinga: Ka tātarihia ngā raraunga
• Te Whakatau: Ka whakaputaina he kōrero me tētahi whakatau hei whakautu i te pātai i tūhuratia. Ka whakaputaina rānei he pātai anō hei tūhura.

Me āwhina ngā mokopuna ki te matapaki i ngā taurangi e toru:

• te taurangi whakatina
• te taurangi whakamauru
• te taurangi rāwekeweke.

Kia kaha hoki koe ki te whakapātaritari i ngā mokopuna i a rātou e mahi ana! He mea nui te whai hononga i waenganui i tēnei mahi me ngā tōpana e whakaaweawe ana i te waka hourua!