I tēnei ngohe, ka whai whakaaro ngā mokopuna ki te nui, ki te uaua hoki o ngā mahi hei whakatere i te waka hourua ki te rapu oranga hou.

Rauemi:

Kāri Kiripuaki

Kupu Marau:

kiripuaki - character

Kupu Here:

mōrehurehu - survivor
rawaka - abundant
tangata ohiti - cautious person
whīroki - thin

Te Horopaki:

Kei runga waka hourua koutou ko tō iwi e tere ana i Hawaiki ki Aotearoa. Kua mōhio koe ki te roa o te haere me te nui o ngā wero ka ara mai! I a koutou e tere haere ana ka whakaekengia tō koutou waka e tētahi atu iwi ki te whakamate i a koutou!

He waka hourua paku kei te taha mauī o tō koutou waka e herea ana, ā, ka whai wāhi ngā tāngata e waru ki runga i taua waka. Ka waimaria ērā tokowaru ki te piki ki runga i te waka paku, ā, ka puta huna atu rātou i te riri, ka kore e kitea. Kua whakaputua atu he kai me ētahi atu rawa e ora ai te tangata mō te toru hauwhā (¾) o te haerenga ki Aotearoa. Mā tō rōpū te tokowaru mōrehurehu e whiriwhiri.

Ko wai te hunga ka whiriwhiri kia whakaeke ki runga i te waka paku, ā, he aha hoki te take i kōwhiri ai i aua tāngata?

Ngā Tohutohu: 

• Pānuitia te horopaki ki ngā mokopuna.
• Hoatu ngā kāri kiripuaki ki ngā mokopuna. Mā rātou e kōwhiri ko wai te hunga mōrehurehu ka whakaeke i te waka paku ki Aotearoa.
• He pātai hei arataki i ō rātou whakaaro:
  • Ko wai ngā momo tāngata e taea ai te whakatere te waka kia tika tae noa ki Aotearoa?
  • He aha ngā pūkenga whakatere waka e tika ai te rere o te waka?
  • Ko wai ngā tāngata manaaki kia ora ai koutou i te hekenga ki Aotearoa?
  • Ko wai ka pupuri, ka whakaako anō hoki i ngā kōrero tuku iho me ngā tikanga i te taenga atu ki Aotearoa?
  • Mēnā ka rawaka ngā kai me ngā rawa kei te waka mō te toru hauwhā noa o te haerenga ki Aotearoa - he aha te momo tangata me eke i te waka paku kia kaua koutou e hemokai?

• Kia 15-20 meneti te roanga o te wā ki te wānanga ko wai te hunga mōrehurehu.
• Ka tū ia rōpū ki te tohe i ngā kōrero mō ngā kiripuaki katoa kua kōwhiria, me ngā take i pērā ai.
• Whakaahuangia ēnei kōrero ki te pū whakaahua, īpapa rānei hei taunakitanga.
• Māu e kōwhiri te katoa o te rōpū, ka tae ora atu ki Aotearoa.
• Kōrero tahi me ngā mokopuna mō ngā pūkenga a te kaiurungi.
• Tuhia ā rātou kōrero ki te papamā.

Ko te nukanuka e whai ake nei he mea akiaki i ngā mokopuna ki te maumahara i ngā ingoa o ngā wāhanga o te waka hourua, i ngā whakamāramatanga mō ngā wāhanga o te waka hourua, me ngā wāhi o ngā wāhanga o te waka hourua. 
Mātakina te ataata - Nukanuka Whakatere Waka, me te ako i ngā ingoa me ngā ā-ringa kia pai ai tō whakaako ki ngā mokopuna.
Ko te mana pupuri i te nukanuka ko: Te Aho Tū Roa  

Rauemi: 

Nukanuka Whakatere Waka
Toimata Foundation & Te Aho Tū Roa (2019)

Ngā Tohutohu:

Whakaakona te nukanuka kia wero i ngā mokopuna ki te maumahara i:

• ngā ingoa o ngā wāhanga o te waka hourua
• ngā whakamāramatanga mō ia wāhanga o te waka hourua
   

Rawa:

• He rūri pōkai
• He hāpiapia

Kupu Marau:

hāpiapia - masking tape 
hoahoa ā-papa - floor plan
roa - length
rūri pōkai - tape measure
whakatau tata - estimate
whānui - width

Kupu Here:

aku - cross-beams
hine - te taha mauī o te waka
ihu - te tauihu, kei mua i te waka
kei - ko te wāhanga o muri o te waka
tama - te taha matau o te waka
hiwi - hull/s
hoe urungi - steering paddle
papanoho - deck
rā matua - he rā kei te tira tū o te ihu o te waka
rā ngongohau - he rā anō kei mua, kei te tauihu o te waka
rā taunaki - he rā kei te tira tū o waenga o te waka

Ngā Tohutohu:

Ko tā ngā mokopuna he whakamahi i te rūri pōkai me te hāpiapia ki te waihanga i tētahi hoahoa ā-papa o te waka hourua, ki te papa o te akomanga. Hei tīmatanga, māu e whakatau te roa me te whānui o ngā hiwi e rua.

• Whakawāteahia te papa o te akomanga.
• Whakawehea ngā mokopuna ki ngā rōpū e toru, e whā rānei.
• Hoatu ngā taputapu ki a rātou.
• Tohua ngā rōpū ki te ine i te roa me te whānui o ngā hiwi. Kātahi ka whakamahi i te hāpiapia ki te hanga i ngā hiwi ki te papa.
• Ka whakatau tata, ka ine, kātahi rātou ka waihanga i ēnei wāhanga o te waka hourua ki te hāpiapia ki runga i te papa:
  • ngā aku
  • te papanoho
  • te hoe urungi
  • ngā wāhi e tū ai te rā matua, te rā taunaki me te rā ngongohau.

• Tohua ngā mokopuna ki te tautohu i ēnei wāhanga ki runga i te hoahoa ā-papa
  • te taha hine
  • te taha tama
  • te ihu
  • te kei
  • ngā rā (matua, taunaki, ngongohau).

• Hei whakamutu ake me tū ā-rōpū ngā mokopuna ki runga i te hoahoa ā-papa kia kite mēnā kua tika te rahi o tēnei waka hourua mō rātou.

Hei Whakapūioio:

Ko ētahi pukapuka hei pānui mā ngā mokopuna ina ngākaunui ana rātou ki te ao o te waka hourua:
He Kohikohinga 7
Te Wharekura 43
Te Wharekura 49