Rauemi:

Living by the Stars Matariki Webisode 2 - Matariki Tohu Mate
Anga - Te Waka o Rangi

Kupu Marau:

anga - template
ataata - video
taiaho - laser
tautohu - identify
tūtohi - table (of information)
whakapūioio - extend, consolidate

Kupu Here:

whakatakune - charades
whetū whakarapa - glow in the dark stars

Ngā Tohutohu:

Whakarōpūhia ngā mokopuna (kia 3-4 ki ia rōpū), ā, hoatu te anga Te Waka o Rangi, ki ngā rōpū. Whakaatuhia te ataata: Living by the Stars Matariki Webisode 2 - Matariki Tohu Mate ki ngā mokopuna. Me mātakitaki te ataata kia toru ngā wā.

1. I te wā tuatahi, ka mātakitaki noa iho.
2. I mua i te mātakinga tuarua, ka tautohu ngā mokopuna i ngā ingoa mō ngā wāhanga o Te Waka o Rangi, ā, ka tuhia ki te wāhanga tika o te anga.
   • Te Ihu
   • Te Rā
   • Te Kei
3. I mua i te mātakinga tuatoru, ka tautohu ngā mokopuna i ngā ingoa mō ngā whetū, me te āhua o ngā whetū, ā, ka tuhia ki te tūtohi o te anga
   • Matariki
   • Te Kokotā
   • Tautoru
   • Te Hao o Rua.

Tonoa ngā mokopuna kia tāngia te āhua o ngā whetū ki te wāhanga tika o Te Waka o Rangi:

• Matariki - Te Ihu
• Te Kokotā - Te Rā
• Tautoru, Te Hao o Rua - Te Kei.

Me wānanga ngā rōpū i ēnei pātai, ā, ka tuhia ā rātou whakautu ki te anga. Hei te mutunga iho, ka tū ia rōpū ki te whakaatu i ā rātou whakautu:

• He aha te mahi a te ihu? He kupu anō mō te ihu o te waka?
• He aha te mahi a te rā? He kupu anō mō te rā o te waka?
• He aha te mahi a te kei? He kupu anō mō te kei o te waka?

Tukua ngā rōpū kia wānanga i ngā kōrero e mōhio ana rātou mō Matariki. Hei te mutunga iho, ka tū ia rōpū ki te whakaatu i ō rātou whakaaro:

• Matariki
  • 7-9 ngā whetū
  • Ngā ingoa o ngā whetū
  • Ngā hononga o ngā whetū ki te taiao
  • Te pūrākau - Ngā Mata o te Ariki Tāwhirimātea

Hei Whakapūioio:

Koinei ētahi whakaaro hei whakapūioio i tēnei ngohe, e titi ai i ēnei akoranga ki ngā ngākau o ngā mokopuna:

Ngā whetū whakarapa - Ka waihanga i Te Waka o Rangi mā te tāpiri i ngā whetū whakarapa ki te tuanui o tō akomanga. Tonoa tētahi/ētahi mokopuna ki te whakaingoa i ngā whetū kia tika (Matariki, Te Kōkota, Tautoru, Te Hao o Rua). Whakamahia he taiaho hei tohu ki ngā whetū.

He rotarota ā-ringa - Tohua ngā mokopuna kia waihangahia he rotarota poto me ngā ā-ringa e pā ana ki ngā wāhanga o Te Waka o Rangi me ngā whetū.

Whakatakune - Whakawehea ngā mokopuna ki ngā rōpū whakataetae e rua, ā, tākarohia te kēmu Whakatakune. Tukuna ngā ingoa mō ngā wāhanga o Te Waka o Rangi, me ngā whetū 
 

He pakitau tēnei e hāngai ana ki ngā wāhanga o Te Waka o Rangi. Tukuna ki tō akomanga, ā, me āta mātai ngā pūkenga ine o ia mokopuna. Tuhia ngā tohutohu ki te papamā hei ārahi i ngā mokopuna.

Kupu Marau: 

āwhata - scale
inenga - measurements
hoahoa āwhata - scaled drawing
mātai - observe
roa - length
tātai - calculate
tātaitanga - calculations
whānui - width

Ngā Tohutohu mā te Mokopuna:

Kua tonoa koe e tētahi ohu tātai whetū kia waihangahia he hoahoa āwhata o Te Waka o Rangi. Kua inea te roa me te whānui o te waka:

• 120m = roa mai i te ihu ki te kei
• 40m = whānui mai i te taha mauī ki te taha matau

Anei te āwhata hei āwhina i a koe ki te tātai me te waihanga i te hoahoa āwhata o te Waka o Rangi:

• 4cm: 20m

E ai ki te āwhata, e hia te roa o te hoahoa āwhata o Te Waka o Rangi, mai i te ihu ki te kei?

E ai ki te āwhata, e hia te whānui o te hoahoa āwhata o Te Waka o Rangi, mai i te taha mauī ki te taha matau?

Whakaatuhia ō tātaitanga me ō inenga.

Hei mahi whakamutunga, tāngia he hoahoa āwhata o te Waka o Rangi.
 

Rawa:

pepa nui x3
pene x6
pene whītau x6
pene muramura x6

Kupu Marau:

matapae - predict
pene muramura - highlighter
pene whītau - felt pen
taupuni - station
tīwhiri - clues

Kupu Here:

Hau-pūkeri - strong, rushing wind
Hau-āwhiowhio - strong, whistling wind
Hau-papaki - gentle, blowing wind
Hau-mangere - gentle, lazy wind
Urukāraerae - strong winds from the sea

Ngā Tohutohu:

Whakaritea tō akomanga ki ngā taupuni e toru. Waiho he pepa nui, he pene, he pene whītau, he pene muramura rānei ki ia taupuni. Tuhia tētahi wāhanga o Te Waka o Rangi, tāngia ētahi tīwhiri, ki ia pepa nui. Kei a koe te tikanga mō ngā tīwhiri, engari anei ētahi kōwhiringa:

• Te ihu - Matariki, karu, Tāwhirimātea, hau
• Te rā - Te Kokotā - tapatoru, hau
• Te kei - Tautoru/ Te Hao o Rua - taurapa, hukahuka

Whakarōpūhia ngā mokopuna ki ngā rōpū e toru, ā, ka noho ki tētahi o ngā taupuni. E 5 meneti te roa ki ia taupuni, ā, ko tā ngā rōpū mahi he wānanga me te tuhi/tā i ngā hononga o Tāwhirimātea ki ngā wāhanga o Te Waka o Rangi.

• Te ihu - Matariki - ko ngā mata o Tāwhirimātea e ārahi ana i te waka ki runga i te ara tika.
• Te rā - Te Kokotā - ka kapohia ngā hau e te rā, kia koke whakamua ai, kia tere hoki te rere o te waka.
• Te kei - Tautoru/ Te Hao o Rua - ko Tāwhirimātea tērā nāna ōna mata i whiu ki te rangi hei whetū, ā, ka whetūrangihia ngā mate o te tau Māori.

Me matapae ngā rōpū i te āhua o ētahi o ngā tamariki a Tāwhirimātea, arā, ko ngā hau ki tai:

• Hau-pūkeri (strong, rushing wind)
• Hau-āwhiowhio (strong, whistling wind)
• Hau-papaki (gentle, blowing wind)
• Hau-mangere (gentle, lazy wind)
• Urukāraerae (strong winds from the sea)

Rauemi:

Anga - Rārangi Wā
Ataata - Living by the Stars Matariki Webisode 2 - Matariki Tohu Mate

Kupu Marau:

ahunga matua - cardinal directions (north, south, east and west)
anga - template
ariā matua - main idea/s
ataata - video
kāpehu - compass

Kupu Here:

hau-marangai, rāwhiti, Tahumawakenui - eastern winds
hau-raki, raki, Hurunukuatea - northerly winds
hau-tonga, tonga, Pārāweranui - southerly winds
hau-uru, uru, Tahumākakanui - western winds

Ngā Tohutohu:

• Whakarōpūhia ngā mokopuna (kia 3-4 ngā rōpū), ā, hoatu te anga - Rārangi Wā ki ia rōpū.
• Whakaatuhia te ataata: Living by the Stars Matariki Webisode 2 - Matariki Tohu Mate, ki ngā mokopuna. Kia rua ngā mātakinga.

1. I te mātakinga tuatahi ka mātakitaki noa iho.

2. I te mātakinga tuarua, tohua ngā mokopuna ki te tautohu i ngā ariā matua o ngā kōrero mō te pūtake o te waka, ā, ka whakakī i te anga rārangi wā:

   • Ka mahuta te waka i te marama o Pipiri, ki te rāwhiti, i te ata hāpara.
   • Ka hao i ngā mate o te wā ki te kupenga o Taramainuku mō ngā marama tekau mā tahi.
   • Ka whakairia e Taramainuku ngā mate ki Te Hao o Rua.
   • Ka whetūrangihia ngā mate o te tau.
   • Ka heke te waka i te marama o Haratua ki te uru i te tōnga o te rā.

   Me mārama ngā mokopuna ki ngā ahunga matua e rua kua hua mai i te ataata - ko te rāwhiti me te uru.

3. Wānangahia ngā ingoa mō ngā ahunga matua, ā, tuhia ki te papamā. Mēnā he uaua ki ngā mokopuna, me hoki ki te ataata e kīia ana ko Whakapapa Hau hei ārahi i a rātou. Ko ētahi o ngā ingoa ka hua mai i tēnei wānanga ko:
   • ngā hau e whā: hau-raki, hau-marangai, hau-tonga, hau-uru
   • ngā ahunga matua: raki, rāwhiti, tonga, uru
   • Te whānau o Tāwhirimātea - Pārāweranui (hau-tonga), Hurunukuatea (hau-raki), Tahumawakenui (hau-marangai), Tahumākakanui (hau-ā-uru)
4. He taputapu te kāpehu  hei whakaatu, hei ine i te ahunga o tētahi haerenga. Ko tā ngā mokopuna he whakamahi i te kāpehu ki te kimi i ngā ahunga matua, mai i ā rātou tūnga i te akomanga.
   • Hoatu he kāpehu me te hāpiapia ki ia rōpū.
   • Tukuna ngā rōpū ki ētahi wāhanga o te akomanga.
   • Me noho ngā rōpū ki tēnei wāhanga o te akomanga, kaua e nukunuku haere.
   • Ka whakamahia te kāpehu kia tohu i ngā ahunga matua e whā - raki, rāwhiti, tonga, uru

Ka whakapirihia te hāpiapia ki te papa hei tohu i ngā ahunga matua. 

He kēmu tēnei hei ako i ngā ingoa rerekē mō ngā ahunga matua.

Kupu Here:

ahunga matua - cardinal direction (north, south, east and west)
torona - stretch out

Ngā Tohutohu:

• Ka marara te tū a ngā mokopuna ki te akomanga
• Ka karanga te kaiako i te ingoa o tētahi o ngā ahunga matua, kātahi ngā mokopuna ka whakaatu i taua ahunga matua mā te toro i ō rātou ringa:
  • hau-raki/raki/hurunukuatea = ka torona ngā ringa ki runga
  • hau-marangai/rāwhiti/tahumawakenui = ka torona te ringa matau ki te taha matau
  • hau-tonga/tonga/pārāweranui = ka torona ngā ringa ki raro
  • hau-uru/uru/tahumākakanui = ka torona te ringa mauī ki te taha mauī
  • tonga-mā-uru (south-westerly) = ka torona te ringa matau kia tītaha ki raro (4 karaka)
  • rangaranga te muri/pākihiroa (north-easterly) = ka torona te ringa mauī kia tītaha ki runga (11 karaka)
• Ki te hē t/ētahi mokopuna, me noho ki te taha.
• Kia tere ake tō karanga i ngā kupu i ia wā kia uaua haere te kēmu.
• Ko te toa ko te mokopuna e tū tonu ana i te mutunga!