Rauemi:

Ngā Manu - Nā Kelly Keane
Tukanga Rangahau
Hei Tauira: Toi Manu Whakaaturanga

Kupu Marau:

anga - template
ataata - video
whakaaturanga - presentation
motuhake - independent
pārongo - information
pātai tuwhera - open ended question
pū whakaahua - camera
rangahau tūtahi - independent research
rārangi tohutoro - reference list
taunaki - evidence
tuhinga tīpoka - notes
tuhinga ā-waha - script
tukanga rangahau - research process
wāhitau tukutuku - URL

Ngā Tohutohu:

1. Pānuitia ngā kōrero a Kelly Keane mō ngā manu me ngā hononga ki te tangata me te taiao. Kei a koe te tikanga kia hia ngā pānuitanga i ngā kōrero. Me whakamahi te tukanga rangahau kua ākona e koe, ki te whakautu i ēnei pātai tuwhera:
   • E ai ki ngā kōrero he wāhi nui tō ngā manu ki te ao Māori. He aha tētahi o ngā take i pērā ai?
   • He aha ētahi tohu o ngā huruhuru manu rerekē ki a tātou te Māori?
   • Ka pēhea tā tātou, tā te Māori matapae i ngā huarere me ngā nekehanga rerekē o te taiao?
   • Ki ō whakaaro e tika ana, e hē ana rānei ngā kōrero a te kaituhi? Whakamāramahia mai.
2. Me hoki ō whakaaro ki te ataata - Te Pakanga a Ngā Manu. I rata koe ki ngā manu uta, ki ngā manu tai rānei? Whiriwhirihia tētahi manu tai, tētahi manu uta rānei hei whakataurite ki a koe. Hei tauira, me he whakapapa ōu ki ngā hapū, ki ngā iwi rānei o te takutai, whiriwhirihia he manu tai.
3. E whai ake nei ko ētahi kaupapa e tika ana kia rangahaua. Hei ārahi i ō mahi rangahau, me waihanga koe i ētahi pātai tuwhera e hono ana ki ia kaupapa. He tauira kei te kaupapa tuatahi:
   • ngā momo tohu o te manu ki te ao Māori - he aha ngā momo tohu o te karoro?
   • ngā whanonga o te manu
   • ngā tae o ngā huruhuru o te manu
   • te hononga o te manu ki te taiao (tohu taiao)
   •  te hononga o te manu ki ahau
4. Whakamahia te anga rautaki rangahau. Tīmata ki ngā kōrero a Kelly Keane, kātahi ka toro atu ki ētahi atu rauemi  (paetukutuku, pukapuka, ataata, whakaahua he aha atu, he aha atu) kia kimihia ngā pārongo hei whakautu i ō pātai tuwhera.
5. Whakaritea tētahi whakaaturanga e pā ana ki ō mahi rangahau. Ko ngā ture o te whakaaturanga:
   • Kia 2-3 meneti te roanga o te whakaaturanga
   • Me waihanga te whakaaturanga ki āu ake kupu
   • Me tuku mihi ki ngā ringa toi, ki ngā puna rangahau mā te whakarite i tētahi rārangi tohutoro ki ngā wāhitau tukutuku.
   • Me whakarite ētahi tuhinga tīpoka, tētahi tuhinga ā-waha rānei hei ārahi i ngā kōrero o tō whakaaturanga
   • Me whakaatu te hononga o te manu ki a koe anō
   • Me kapo tō whakaaturanga ki te pū whakaahua, ki te īpapa rānei. Mā tō kaiako koe e āwhina.
   • Me tiaki tō whakaaturanga hei taunaki aromatawai ki te Kete Manarua.
      

Rauemi:

Hei Tauira Manu Taratahi | He Manu Taratahi nō Ngāi Tūhoe
Te Mahi Hoahoa | Anga - Hoahoa
Te Tukanga | Te Papatipu 1: Ngā Manu Tukutuku (wh. 26-32)

Kupu Marau:

anga hoahoa - design template
huritao - reflection/s
rauemi hou - modern materials
rawa taiao - materials from the environment
taunaki - evidence
whakaniko - enhance
whakarākei - decorate

Kupu Here: 

aho - thread
ara piki - stairs
huruhuru manu - bird feathers
kaho huapae - horizontal lengths of a manu taratahi
kaho poutū - vertical lengths of a manu taratahi
kōpekapeka - zigzag
kōwhiti - cross-stitch
manu taratahi - a manu aute with an apex point
ngira - needle
pūwāhi - base point
rīpene - ribbon
taimana huapae - horizontal diamond
tara - apex point
tuinga - stitch
tūmatakahuki - binding stitch
wūru - wool

Horopaki:

Kua tonoa koe e Te Whare Taonga o Te Papa kia waihangahia tētahi manu taratahi e pupuri ana, e whakaatu ana anō hoki i āu rangahau mō tētahi manu tai, manu uta rānei. Waihoki, me tuitui āu ake hononga ki taua manu uta, ki taua manu tai rānei. Kia kotahi mita te roa o te manu taratahi!

Ngā Herenga:

• He manu taratahi e whakaatu ana i tō hononga ki tētahi manu uta, ki tētahi manu tai rānei
• He manu taratahi kua hangaia ki ngā rawa taiao
• He manu taratahi kua whakanikohia ki ngā rauemi hou
• He manu taratahi kua whakarākeihia ki ngā huruhuru manu
• He mahere hoahoa e whakaatu ana i ō whakaaro e pā ana ki te waihanga manu taratahi

Te Tukanga:

Mō te waihanga i te manu taratahi, tirohia ngā whārangi 26-32 o te rauemi Te Papatipu 1 - Ngā Manu Tukutuku

Ngā Rawa Taiao:

Hangaia tō manu taratahi ki ngā rawa taiao:

• Kia 4 ngā toetoe, ngā kōrari, ngā rākau taimāmā rānei hei kaho poutū
• Kia 60-80 ngā raupō, ngā rākau taimāmā rānei hei kaho huapae
• Kia whā ngā rau harakeke (2mm te whānui)
• He kohinga huruhuru manu hei whakarākei i tō manu taratahi

Ngā Rauemi Hou:

Whakamahia he rauemi hou hei whakaniko i tō manu taratahi ki ngā kaupapa tukutuku:

• He wūru
• He silco
• He rīpene 
• He jute

Ngā Tuinga Tukutuku:

E rua ngā tuinga tukutuku e whai ake nei:

Kōwhiti - koinei te tuinga matua o ngā mahi tukutuku. 

Tūmatakahuki - koinei te tuinga tapu o ngā mahi tukutuku. Me whakamahi tēnei tuinga ki ngā tahataha o te mahi tukutuku.

Ngā Kaupapa Tukutuku:

Ko ētahi kaupapa tukutuku ēnei e tuitui ai ki tō manu taratahi. Kia mōhio mai koe, he maha ngā momo kaupapa tukutuku.

Niho Taniwha - He rārangi kōpekapeka te niho taniwha, ā, kei roto i ngā peka ētahi tapatoru. Ko tētahi whakamāramatanga o te niho taniwha he whakataurite i te rangatira ki te taniwha. Kia tīkina atu ngā kōrero o Waikato e kī ana, he piko, he taniwha, ā, ko te tikanga he rangatira kei ia piko o te awa o Waikato!

Poutama - He rite te poutama ki te arapiki. Ko ētahi whakamāramatanga o te poutama he tohu i te ara ki ngā rangi tūhāhā pēnei i te ara i takahia ai e Tāwhaki. He whakaatu anō hoki i ngā rārangi whakapapa o te tangata.

Pātikitiki - He rite te pātikitiki ki te taimana huapae. Ko tētahi whakamāramatanga o te pātikitiki ko te ranea o ngā rawa taiao o tētahi wāhi, o ngā ringa hora rānei o tētahi tangata.